Regula Rutz è naschida en ina famiglia francofila: sia mamma è stada in onn a Paris e la fevra franzosa n’ha mai pli laschà libra ella. Quai ha er influenzà la vita dals uffants. Mintg’onn fascheva la famiglia vacanzas en Frantscha e mintga glindesdi saira vegniva guardà l’emissiun «Spécial Cinéma» da la televisiun romanda. Las atgnas enconuschientschas dal franzos ha ella approfundà suenter la matura durant in segiurn linguistic en Frantscha a Carouge e Quimper. Suenter il studi da scolasta secundara phil I e suenter avair instruì intgins onns è ella puspè ida davent: sco guida da viadi en Grezia, en l’Europa Orientala ed en l’Asia, nua ch’ella ha betg mo declerà tempels e plantaschas da té a Svizzers tudestgs, mabain er a Romands – per franzos, quai che l’ha fatg suar mintgatant da manidel. Pli tard è ella ida en l’USA, nua ch’ella ha absolvì in segiurn linguistic e scuvrì il plaschair dal schurnalissem.
Returnada en Svizra ha ella frequentà la MAZ a Lucerna, nua ch’ella ha fatg il diplom supplementar en schurnalissem. Per schabetg è ella vegnida tar il radio. Per fortuna, pertge avant la scolaziun n’aveva ella mai pensà da far radio. Oz èsi sia gronda passiun da raquintar als umans davart las vitas dad autras persunas, da crear chapientscha e da furmar punts. A questa passiun ha ella era pudì sa deditgar durant ses temp sco correspundenta da DRS 1 a Nova Delhi en l’India. Nova Delhi l’ha era puspè avischinà als Romands: blers amis ch’ella ha emprendì d’enconuscher là eran oriunds da la Svizra romanda. Perquai sa legra ella da pudair raquintar uss als Romands da la vita e dals umans en la Svizra tudestga. Regula Rutz lavura sco producenta tar DRS 1 e viva cun sia famiglia a Turitg.
