Christina Caprez

Sco figlia d’ina Tudestga e d’in Grischun è Christina Caprez bain creschida si en l’Argovia, ma ella ha passentà numerusas vacanzas a Puntraschigna en l’abitaziun da sia basatta e da ses basat. Cunquai ch’il rumantsch n’è betg vegnì dà vinavant en sia famiglia, ha ella emprendì la lingua pir sco creschida – e lura anc sursilvan, dal punct da vista engiadinais il fauss idiom. 

 

Tar Schweizer Radio und Fernsehen (SRF) è Christina Caprez vegnida pir suenter il studi da sociologia, etnologia ed istorgia e suenter ils segiurns en l’Italia, il Portugal ed a Berlin. Set onns ha ella lavurà sco redactura e moderatura da DRS 2. Actualmain è ella engaschada 50% tar «DRS2aktuell», il magazin per cultura, savida e societad, e tar «Atlas», l’emissiun davart il mintgadi en auters pajais. Christina Caprez sa legra da rapportar da la Bassa per la populaziun rumantscha e d’intensivar uschia il contact cun la Rumantschia.