Davide Gagliardi

Naschì e creschì si è Davide Gagliardi en il Tessin, en in vitget damanaivel da Chiasso. Da pitschen ensi è el adina stà mirveglius ed ha gì interess per tut. El è in tip che fa gugent viadis e scuvertas. Perquai è el fitg savens en gir – professiunalmain sco era privat. L’onn 2001 ha Davide Gagliardi frequentà la scola da teater Centro Teatro Attivo a Milaun. Ils onns sequents è el adina puspè sa participà a differents seminaris e lavuratoris per acturs a Milaun e Turitg. Sias mirveglias han er intimà il schurnalist che lavura oz per Rete Uno da prender uras privatas da tudestg svizzer – per el in’experientscha zunt interessanta.

 

Avant che Davide Gagliardi ha cumenzà a lavurar tar la Radiotelevisione svizzera di lingua italiana (RSI) è el stà engaschà sco translatur da tudestg-talian en ina gronda interpresa a Basilea. Las enconuschientschas necessarias aveva el acquistà durant in studi da translatur a la Scola auta per scienzas applitgadas da Turitg. En ils trais onns che Davide Gagliardi lavura gia per RSI ha el emprendì d’enconuscher blers aspects dal schurnalissem. El ha moderà emissiuns en il studio, è stà en acziun sco videoschurnalist per emissiuns en directa, ha realisà contribuziuns da film e reportaschas da radio. Actualmain lavura el sco moderatur da radio per differentas emissiuns da Rete Uno. El sa legra da rapportar en il rom dal project actual per DRS 1 davart il Tessin ed ha mirveglias, sche sia instrucziun da tudestg svizzer ha purtà fritg.