Alessandra Cattori

Locarno, la pli chauda citad da la Svizra, è er il lieu da naschientscha dad Alessandra Cattori. Ses studi da las scienzas socialas ha ella absolvì a Losanna, nua ch’ella ha ultra da quai era fatg il master en economia ed administraziun sin il sectur da la sanadad. Alura è ella viagiada in pèr onns enturn il mund ed ha lavurà sco guida da viadi en il turissem. Enavos en Svizra ha ella lavurà l’emprim en il champ organisatoric per la Pro Senectute Ticino e Moesano, alura sco assistenta en ina chasa d’attempads. Parallelamain è ella entrada en il mund dal radio ed è s’engaschada tar Radio Fiume Ticino. Questa experientscha ha sveglià sia passiun per il medium radio, l’ha a medem temp però era purschì la schanza da midar a la televisiun. Avant tschintg onns ha ella perquai cumenzà a lavurar tar Teleticino, nua ch’ella ha realisà reportaschas davart differents temas e lieus, ina talkshow cun uffants ed in program per persunas en la terza fasa da la vita.

 

L’onn 2008 ha Alessandra Cattori midà a Radiotelevisione svizzera di lingua italiana (RSI), nua ch’ella ha moderà il program da divertiment «latele» sco er emissiuns en il studio ed emissiuns en directa. Il schaner 2010 è ella returnada al radio e lavura ussa per Rete Uno. En sia funcziun mumentana gida ella a concepir il program d’uffants e realisescha reportaschas en directa.