Toni Poltera

Creschì si è Toni Poltera a Savognin. La matura – tip C, direcziun matematica/ scienza – ha el fatg a Cuira e ses studi da scienzas publicisticas e sociologia a l’Universitad da Turitg.

 

Toni Poltera lavura dapi il 1990 tar Radiotelevisiun Svizra Rumantscha (RTR) en differentas redacziuns e funcziuns. Actualmain è el engaschà là per 80 pertschient sco producent e responsabel per ils cuntegns da las emissiuns d’infurmaziun da Radio Rumantsch e maina en pli il team da moderaziun Infurmaziun e quel da la redacziun da sport. Per sia funcziun sco referent da medias da RTR impunda el ulteriurs 20 pertschient da ses pensum da lavur.
El s’occupa da cifras e da statisticas sco era da la perscrutaziun dal public. Toni Poltera è maridà e bab da duas mattas da 5 ed 8 onns. Ses temp liber deditgescha el a sia famiglia, al sport ed a la recreaziun.