Astrid Alexandre

Cura ch’ella è vegnida a viver cun sia famiglia en Svizra e na pudeva tuttenina betg pli discurrer franzos cun ils uffants vischins, ha Astrid Alexandre percurschì per l’emprima giada ch’ils cunfins da sia lingua èn a medem temp er ils cunfins da ses mund. Dapi lura emprenda, viva ed ama ella las linguas.

Suenter ch’ella ha instruì in pèr onns e cumenzà in studi, furman oz trais occupaziuns principalas ses mintgadi: il radio, la tribuna e la scola. Ella na sa decida numnadamain betg gugent ed uschia decida ella savens da far tut e da prender il tschintger ed anc la mitga.

 
Tgi che tschertga Astrid Alexandre, duess empruvar quai a Cuira, Paris u en il restaurant da las VFF en la mesadad dal tren. Sco correspundenta da RTR per «Die Anderen. Les autres. Gli altri. Ils auters.» spera ella da pudair regalar als Romands intgins «muments-aha».