Swissness en l’Africa dal Sid
Ils emprims quatter radios e la plattafurma da multimedia da la SRG SSR preschentan a la Svizra l’Africa dal Sid, il pajais dal campiunadi mundial da ballape.
Dals 7 fin ils 11 da zercladur 2010 emettan DRS 1, La Première, Rete Uno ed il Radio Rumantsch en directa da Vanderbijlpark, il quartier da l’equipa naziunala svizra durant il campiunadi mundial. En il center da las emissiuns stattan interpresas, organisaziuns e persunas svizras. Discurrì vegn davart las relaziuns economicas e commerzialas, il turissem, la societad, la cultura e la politica, ma era davart la vita da Svizras e Svizzers emigrads. En il rom dal 10avel project interregiunal cun il titel «RadioSidafrica» furman ils quatter emprims programs da radio puspè ina redacziun communabla plurilingua. Swissinfo è quest onn per l’emprima giada da la partida. La plattafurma da multimedia da la SRG SSR idée suisse cumplettescha ils rapports dals radios cun texts e maletgs multifars.
Illustraziun: Vanderbijlpark / swissinfo.ch,Samuel Jaberg
